Sisindiran Sunda - Tatang Sumarsono

 SISINDIRAN BANDUNG

(tawis ngiring bingah, milangkala Kota Bandung ka-213)

Cikapundung nunjang ngidul

geus limpas caina malik

ka Bandung teu weléh ngabrul

geus betah mah sungkan balik

tangkal randu di astana

di Sirnaraga geus sidik

Bandung gegek pangeusina

kosongna mun usum mudik

sisindiran, éta sisindiran

kamonésan urang Sunda — adeuh

nu ngupingkeun, éta nu ngupingkeun

entong gancang kaisinan — heuheuy 

ngalangkung ka Cipaéra

rék nyimpang ka imah sobat

Bandung gaduh balaréa

sanés kagungan pejabat

mahoni reujeung angsana

dipelakna di Cisokan

mun kota tartib ngaturna

moal timbul pasirikan

sisindiran, éta sisindiran

heureuy lantip urang Sunda — adeuh 

najan heureuy, éta najan heureuy

sok saluyu jeung buktina — heuheuy 

**